შეხვედრა GAST პირველ და მეორეკლასელებთან

დღეს ძალიან მნიშვნელოვანი დღე გვქონდა. GAST-კამპუსში, სასკოლო სივრცეში პირველად ვუმასპინძლეთ ჩვენი სკოლის პირველ და მეორეკლასელებს შემეცნებითი ვორკშოფებითა და სამეცნიერო შოუთი, გაიცნეს კლასელები და დაათვალიერეს სასკოლო გარემო.

სანდრო ასათიანის “წიგნის სახელოსნოს“ ფარგლებში ავტორმა ბავშვებთან ერთად წაიკითხა ჩანახატები და მოეწყო დისკუსია, შემდეგ კი პატარა GAST–ელებმა ხატვის ვორკშოფის ფარგლებში თავიანთი ნახატები დაგვიტოვეს, რომლის ნახვაც კამპუსის ყველა სტუმარს შეეძლება.

„წიგნის სახელოსნოს“ აქტივობების შემდეგ ექსპერიმენტორიუმის ჯადოსნური სამეცნიერო შოუ გაიმართა და ბავშვებს ჰქონდათ შესაძლებლობა ექსპერიმენტებში თავად მიეღოთ მონაწილეობა.

სკოლის დირექტორმა, ირაკლი მანელიძემ და დირექტორის მოადგილემ, მაია კუბეტოვამ მშობლებისთვის საინფორმაციო შეხვედრა ჩაატარეს.

მოუთმენლად ველოდებით 25 სექტემბერს, სწავლის დაწყებას, როცა ყველაზე მნიშვნელოვანი  – ბავშვების ჟრიამული შეემატება ჩვენ კამპუსს.

Photo Credit: Leli Blagonravova